ورقة شجر

ورقة شجر كانت بتصحى كل يوم بالندى غرقانه
والقلب رعرع بالخضار وإيه فرحانه

حواليها الطيور وسامعه صوت الزقزقه
وكل يوم فراشه بتشق الشرنقه
ويمام كتير هربان بيتوارى ف حضنها
لما يشوف صياد بالبندقيه أم العيون مبرقه
ووقت ما حر الشمس يشتد وساعات النهار تمتد
ف ضلها يرتاح اللى تعبان م الشقى
ووقت العصارى عشاق كتير ف ساعة الملتقى
وتعد مين فيهم اللى حب بجد ومين اللى ادَّعى
وفجأه هب الظلام ويا السكون مجموع
وصفير زوبعه جاى من بعيد مسموع
وف لحظه غام الجو وطفيت كل الشموع
وقطر الندى اتغطى بالدموع
وكل ورقه عالشجر صارت ف الهوا طايره
وبين جذوع وفروع متلطمه وحايره
وبين شقوق الارض متجرحه وسايره
ويا زوابع الهوا دايره
بتقضى ف الايام وضلوعها بتتفتت
بكيانه على حالها ولحالها بتسكِّت
بعد ما فروعها خانتها ولكل الروابط فكت
قدرها تكون ورقة شجر جالها الخريف جفت
ماكانش أملها تشوف بين الورق أزهار
أملها بس كان يفضل فى عروقها خضار
بس الربيع فيه حياه ولكل روح أعمار
ماتت خلاص .. ماتت خلاص
وبقى بينها وبين الشجر أسوار ورا أسوار
 
                                                     أيمن حمدى

انا الشعب الحيران

انا الشعب الحيران
بين واحد ليبرالى وواحد اخوان
لو قلت اخوانى يقولوا عليا تاجر دين
وان قلت حداثه وليبرالى اتكفرت من التانيين
أصدق مين وأبايع مين؟!
عايز أختار من غير ما اتهان
د انا الشعب أساس الدوله
مين عايزيين ياخدزها مقاوله؟!
تسقط ..تسقط أى محاوله
د انا الثوره ف عين كل الازمان
أنا لبلادى دايما حالف
عهدى معاها عمرى ما اخالف
انا باسمى الحاكم سالف
هو بيمشى وانا بندان
انا اللى بنيت بإيديا هرمها
ودفنت ف جواه م الفراعين أعظمها
انا الناطق بكلامها
وانا الصمت ف بعض الاحيان
انا الحارس عالحراس
واللى بأرخ ف الكراس
مين ينصان ومين ينداس
مين مطرود ومين متقابل بالاحضان
انا مواردها البشريه
العلنيه والسريه
انا اللى هديتها الحريه
يوم ما ضربت الظلم بايدى عالسندان
انا اللى بَحَكِّم ظالم وبرئ
انا اللى بصنف جيد وردئ
انا اللى بصوت ف الصناديق
والاخر بارجع ندمان
انا خيوط الحزن السوده
واوتار الفرح المشدوده
انا غناويها واذكارها المنشوده
انا اللى ف حضن واديها بالليل وَنسان
الشرفا ف عيون الناس مراتبهم راقيه
والخونه بينداسوا وقت ما بتدور الساقيه 
الكل هيمشى ومصر الباقيه
دى ف عز خريفها ما بتنفضش ورقها الاغصان
وانا ف عز ربيع الثوره لسه حيران
بين واحد ليبرالى وواحد اخوان

                                أيمن حمدى
 

            أم العجايب 
يا ام العجايب عاشق شبابك 
والشعر لو شابك اكتب بايدى كتابك
واكون لك ولد وحبيب ونسيب لكل انسابك
احبك بكل ما فيكى وأعادى اللى ما يعمل حسابك 
يا ام العجايب
فيكى ليل مخبى وراه كل النجوم نواره
وفيكى الصبح حاضن شعاع نهاره
فيكى اللى ماسك بإيده عالرحا والدنيا ليه دواره
وفيكى مطحون بين رحايا الزمن والدنيا عليه دواره
وفيكى عمده باع اهل البلد واشترى دواره
وفقير يبوس تراب البلد ومن الصفيح داره
يا أم العجايب دايب
يا شرق عايز الغرب جاره
يا دير عباده متحصنه اسواره
يا بير اسرار ما تعرف قراره
يا طريق مهدك الزمن لمشواره
يا طير فى الغيم تاه منه مساره
يا بحّار فى بحر هايج على البحاره
يا عرايس الحياه عالمسرح يا متعلقين بدوباره
يا حاضرين للبكا والضحك بحركه او بإشاره
يا ام العجايب والله دايب
يا دكاترة الطب يا وصفات العطاره
يا علم وإيمان يا ساحر وسحاره
يا سكون السكون فى أبعد مغاره
يا رماد يبات يتحول لناره
يا حزن جوه العيون متدارى بنضاره
يا ضحكه من الفرح طالعه بإعصاره
يا حجر رشيد يا أثر الحضاره 
يا حجر المقطم يا سوء الإداره
يا أم العجايب فيكى دايب
يا حكيم سياسى يا دبلوماسى من غير سفاره
يا حزب كنبه حابب سكاته وماضى إستماره
يا شوق للحياه وقت الفرح 
وشوق للآخره وقت الخساره
يا قاموس لكل البشر يا اعلى مناره
يا عزم فرعون ياللى بنيت الهرم 
ودفنت جوه التابوت اسراره
يا حلم كان موصول وانقطعت عنه الحراره
يا طعم العسل من نبعك يا نبع المراره
لو تسألى بتحبنى؟! اقولك شوفى العيون
هتشوفى للعشق أماره وأماره وأماره
يا ام العجايب فيكى وفيكى وفيكى
أحبك بكل ما فيكى وأعادى اللى ما يعمل حسابك
وأعشق شبابك والشعر لو شابك أكتب بإيدى كتابك
وأكون لك ولد وحبيب ونسيب لكل أنسابك 


                                           أيمن حمدى

سفينة الثوار

تجمع كل الاحرار والثوار على أرصفة مرسى التحرير بعد ان جائهم النداء بأن طوفان العدل قادم ، تحركت اعينهم صوب سفينتهم تلك التى مكثوا لصناعتها ثلاثين عاما
والتى أخذوا يجمعون ألواحها من كل بقعه على أرض بلادهم  وبرغم كل الظروف والمصاعب أتموا صناعتها ؛ منتظرين هذه
اللحظه للابحار فى بحر الحريه والكرامه , تحرك كل الشرفاء للصعود الى سفينة النجاه وهم ينادون على اخوانهم هيا اصعدوا معنا
. ولكنهم استكبروا وآثروا الوقوف الى جانب السلطه ضد الشعب المتحرر .
بدأ السيل والاحرار فرحون يهتفون الله اكبر الله اكبر
والخونه يتحسرون على مصيرهم الهالك,يحاولون النجاه فيرسلون زبانيتهم متخفيين فى الليل فيتسللوا متسلقين الى السفينه لمحاولة الوقيعه بين الاحرار والتخلص منهم والتحكم فى السفينه لانقاذ مواليهم ؛ ولكن أُكتشف أمرهم بسهوله فسيماهم فى وجوههم من أثر النفاق
وأسرع الثوار بالقائهم من أعلى السفينه الى جوار مواليهم فى الهلاك .
وواصلت سفينة الثوار ابحارها لا تدرى متى وأين سترسى ولكن كل من ركبوا فيها واثقون انهم ماضون على الطريق الصحيح.

                                                                                                           بقلم / أيمن حمدى

انا بره الميدان

انا بره الميدان
وانت يا الثاير فكر عقلى وحال لسانى
كلمتك من نبض قلبى , صوتك وصلنى من تانى حيانى
ميدانك مهما بطوف هو الاصل عنوانى
مصرى وابن مصرى واللى راح سابنى تايه فى كل الموانى
هتاف الحق يا تحرير يوصلنى يملى عليا مكانى
اهتف معاك يرجعلى صدى الصوت محكوم بجدرانى
منا بره الميدان
وانت يا الثاير واقف تجاهد
وبصوتك العالى حقانى وانا من مكانى عليك شاهد
حابب تزور السما حالك من زمانك زاهد
ايدك ف ايد اخواتك مواليد الميدان معاهد
واللى كارهك قاعد يفبركلك صور ومشاهد
ويقول عليك العدو وانت فى الحق مجاهد
وانا بره الميدان
بالع حبوب هلوسه او طالع من فنوس مسحور
قالوا عليك شاب مأجور
دفعولك فلوس لاجل متكون اسد وتثور
تحب تاخد كام ويخلوا دمك يجرى عالاراضى بحور؟!
عقول مضلمه ساكناها الافاعى وفكرها السليم مهجور
هيفضل مليها الجهل وانت ف سماء الحق بدر بدور
وانا بره الميدان
فى غربه فيها العسل مسموم
وفكرى ف بلادى زيك كمان مهموم
وحلمنا واحد صريح مفهوم
والخاين قصاد العين كابوس معلوم
زى الغراب فى طلته مشئوم
وانت فى طلتك يرتاح لها المظلوم
وانا بره الميدان
كمل وجمد قبضتك وعلى صيحتك
مفيش بلطجى على هيئتك
كمل خطاويك عاشقه سكتك
بلدك امانه تسلمها لعيالك ف وصيتك
يا امين عالثوره يا صافى ف نيتك
كان نفسى اكون فى حضرة حضرتك


لكنى بره الميدان