الغربه 1
يا غربه ياللى بعدتينى عن ناسى وعن اهلى
وصحبة سنين سبتها وجريت على حلم كان وهمى
الحكم حكم القدر وغربتى رسمها سوء فهمى
رسمت الورد فى طريقى لقيت الشوك مطرح ما بمشى
حلمت بربيع فيه الزهور متدبلشى
شفت من الخريف فصول اربعه. ازاى؟! متسالشى
حذرونى وقالولى دى سكه فيها الرايح ميرجعشى
وانا كنت ماشى على رسمى ولغير دماغى مبسمعشى
وان كنت من جوه ببكى وعيونى مبتدمعشى
دلوقتى العيون بتبكى بحرقه بس يا خساره البكا مينفعشى
بلاد الغربه ماليها صمت كئيب وسكون
كأنك عايش وحيد فى كون غير الكون
ومين تلاقى غير نفسك لنفسك عون
وانت فى وسط ناس كل يوم متلونه بلون
على ايه شبابى يروح وعلى ايه غربتى تهون؟!
هوه الرزق بالغربه لازم يكون مرهون؟!
لو الفكر كده يبقى فكر شيطان ملعون
الرزق مقدره ربى مطرح مكون هيكون
ايمن حمدى
حاره ومشربيه
ناس سهاره وام بتدعى ربها فى الفجريه
اب نازل يعرق علشان ولاده بيشتغل بعزم وجديه
شبابيك بتتفتح وسلامات بتتوزع م الصبح لحد العشيه
قرآن بيقرا ف كل دكان فى الصبحيه
على جدرانها متوزعه براويز الصبر وآيات ربنا القرآنيه
زهرة ريحان فى كل بلكونه متروقه ومسقيه
بيوت متشققه بس جواها القلوب مرضيه
ناس فى فرحك تشاركك والسعاده تلقاها فى قلوبهم مرئيه
وفى الشده تلاقى مين يساندك .ضهورنا جوه الحاره محميه
شهادة الشهامه هنا من ولاد البلد ممضيه
روح الفكاهه والهزار..هموم الدنيا جوه الحاره منسيه
ناس مسامحه جواها خير ناس ماتعرفش الازيه
وقت اللعب حريفه بيتقسموا اهلاويه و زملكاويه
ووقت الجد تلقاهم واحد حيطة صد قويه
عزاز النفس ولو هدومهم متقطعه ومهريه
راضيين وشبعانين ولو بطونهم م الجوع ملويه
وشوش م الشقى متعفره لكن جوه القلوب بالدهب مطليه
الحزن هنا قدام الايمان ايامه معدوده وصفحاته مطويه
لو تتزنق تلقى مين يقولك يا عم سيبها على الله بكره تتعدل وتلقاها مقضيه
والفرح فرح بجد زغاريطه مسموعه وانواره ضاربه فى السما مضويه
بنوته جميله عالسلمه قاعده عنيها عالنجوم فرحانه ومغويه
واخوها بيجرى ويا القمر بيسابقه ويضحك ضحكاته فى الهوى مدويه
الحاره عيله كبيره لمه كل الناس ولادها .ناس مليها الحب والحنيه
باللمه والفرحه ايامها معديه.
وف لحظه راحت مننا الحاره واتكسرت بين ادينا المشربيه
وبنولنا عماره عاليه طول الحاره وعرضها يمكن اعرض كمان م الحاره
بس اللى جواها يا خساره مش هوه اللى جوه الحاره
بره العماره ازاز جميل لكنه خبيث مكتوم بكتامات
لا يعكس حزن ولا تسمع من وراه ضحكات
طب منين هيتعاونوا ومنين تلاقى للفرح والجرح بينهم مشاركات
قدام العماره تلاقى م الحرس قوات
وجهاز كشف الغلابه م البهوات
م الباشا الكبير ساكن هنا وايده معلمه عالناس علامات
عشان كده بيخاف ونفسه يحط من الحرس كمان ميليشيات
جوه العماره تلاقى ليوم القيامه علامات
الحب الحقيقى هنا خلاص مات
مبين الجيران هنا مفيش سلامات
مبين الجيران هنا هاى وباى من باب الايتيكيت والمجامالات
جيران ميعرفوش اسامى بعضهم الا م اليفط واللافتات
الباشا بيصحى على سوق الدهب والبورصه والعملات
والمدام يدوب بينها وبينه تلات اربع كلمات
سبت الفلوس ؟ مضيت الشيكات؟
مش فاضيه عندها النادى فيه الحبايب والزميلات
طب فين الولاد؟
عايشين متعرفش ان كانوا مصريين ولا خواجات
الابن الكبير شاب فى العشرينات
ميعرفش معنى المسئوليه,ميعرفش غير ظبط الدماغ والمزاجات
والبنوته مقضياها مع الانتيم سهر وخروجات
ولما ينصبوا الحفلات, الباشا الكبير ينفخ ويطير بلونات
ويرقص مع المعازيم رقصات
علشان كام مليون.....عموله من ضمن العمولات
ومن باريس تيجى طيارة العشى باشهى الاكلات
ورجس الشيطان بين ايديهم بالتلج ف كاسات
والستات بملابس السهره الرسميه كاسيات عاريات
لو بايدى كنت اهد كل العمارات
وابنى بالنضيف من كسرهم حارتى الجميله
حارة السقا اللى م الظلم طء ومات....
ايمن حمدى
تبدلت حياتى بعفوك العظيم
تبدلت حياتى بعطفك الكريم
ربى بارك توبتى وايد للحق ثورتى
ربى تصارعت فى نفسى اقطاب
اقطاب خير وشر فى عراك دائم ما تابوا
ربى ارنى الخير منتصرا والشر اجعله عبرة لمن فى الخيرين قد عابوا
دمع الفؤاد لنشوة النصر مشتاقا
فدع افعال ابليس تطير من قلبك مثل تبخر الماء
فيمطر السحاب لينبت الخير فى القلب باذن رب السماء
ربى اخاف الانحدار بعد الرقى اذلالَ
فكم من عزيز زال منه العز اجمالا
واصبح تحت العباد ذليلا مهانا
ربى تب على واحفظنى من زحف الشرور
ربى هب لى الرضا ربى هب لى السرور
ربى كما ثبت الارض بالجبال الرواسى
ثبتنى على الحق دوما مهما صادفت المآسى
ربى قد عاتبت نفسى عتابا قاسيا
والنفس انت مولاها فمن يكون غيرك هاديا
ربى حمدا لك على الخير الذى آلت اليه حياتى
فلك الشكر كل الشكر طول العمر حتى مماتى
ايمن حمدى
الغربه 2
ولما يجى الربيع يرمى ف زهره الجميل
ويروح الصيف بذكرياته وجماله وشمسه
