ورقة شجر

ورقة شجر كانت بتصحى كل يوم بالندى غرقانه
والقلب رعرع بالخضار وإيه فرحانه

حواليها الطيور وسامعه صوت الزقزقه
وكل يوم فراشه بتشق الشرنقه
ويمام كتير هربان بيتوارى ف حضنها
لما يشوف صياد بالبندقيه أم العيون مبرقه
ووقت ما حر الشمس يشتد وساعات النهار تمتد
ف ضلها يرتاح اللى تعبان م الشقى
ووقت العصارى عشاق كتير ف ساعة الملتقى
وتعد مين فيهم اللى حب بجد ومين اللى ادَّعى
وفجأه هب الظلام ويا السكون مجموع
وصفير زوبعه جاى من بعيد مسموع
وف لحظه غام الجو وطفيت كل الشموع
وقطر الندى اتغطى بالدموع
وكل ورقه عالشجر صارت ف الهوا طايره
وبين جذوع وفروع متلطمه وحايره
وبين شقوق الارض متجرحه وسايره
ويا زوابع الهوا دايره
بتقضى ف الايام وضلوعها بتتفتت
بكيانه على حالها ولحالها بتسكِّت
بعد ما فروعها خانتها ولكل الروابط فكت
قدرها تكون ورقة شجر جالها الخريف جفت
ماكانش أملها تشوف بين الورق أزهار
أملها بس كان يفضل فى عروقها خضار
بس الربيع فيه حياه ولكل روح أعمار
ماتت خلاص .. ماتت خلاص
وبقى بينها وبين الشجر أسوار ورا أسوار
 
                                                     أيمن حمدى

انا الشعب الحيران

انا الشعب الحيران
بين واحد ليبرالى وواحد اخوان
لو قلت اخوانى يقولوا عليا تاجر دين
وان قلت حداثه وليبرالى اتكفرت من التانيين
أصدق مين وأبايع مين؟!
عايز أختار من غير ما اتهان
د انا الشعب أساس الدوله
مين عايزيين ياخدزها مقاوله؟!
تسقط ..تسقط أى محاوله
د انا الثوره ف عين كل الازمان
أنا لبلادى دايما حالف
عهدى معاها عمرى ما اخالف
انا باسمى الحاكم سالف
هو بيمشى وانا بندان
انا اللى بنيت بإيديا هرمها
ودفنت ف جواه م الفراعين أعظمها
انا الناطق بكلامها
وانا الصمت ف بعض الاحيان
انا الحارس عالحراس
واللى بأرخ ف الكراس
مين ينصان ومين ينداس
مين مطرود ومين متقابل بالاحضان
انا مواردها البشريه
العلنيه والسريه
انا اللى هديتها الحريه
يوم ما ضربت الظلم بايدى عالسندان
انا اللى بَحَكِّم ظالم وبرئ
انا اللى بصنف جيد وردئ
انا اللى بصوت ف الصناديق
والاخر بارجع ندمان
انا خيوط الحزن السوده
واوتار الفرح المشدوده
انا غناويها واذكارها المنشوده
انا اللى ف حضن واديها بالليل وَنسان
الشرفا ف عيون الناس مراتبهم راقيه
والخونه بينداسوا وقت ما بتدور الساقيه 
الكل هيمشى ومصر الباقيه
دى ف عز خريفها ما بتنفضش ورقها الاغصان
وانا ف عز ربيع الثوره لسه حيران
بين واحد ليبرالى وواحد اخوان

                                أيمن حمدى